Ko te kaupapa o tēnei noho hei whakakotahi i ngā rangatahi. Tau 8 & 9. Ko te whāinga matua, kia whai hononga ngā ākonga – rātau ki a rātau , ā-kura kaupapa Māori nei; rātau ki ngā mātauranga a ngā mātua tupuna Māori, otirā, ki ngā mātauranga pūtaiao, taiao hoki o te ao hurihuri nei; rātau ki tō rātou taiao, ki a Ranginui rāua ko Papatūānuku me ngā atua Māori katoa o tō tātau ao tū roa.
Wāhi: Te Rau Karamu Marae, Te Whanganui-a-Tara
Kanohi ō Hina: Maure ki te Ōhua – 3 ki te 5 o Āperira
Taitamariki: 24, Tau 8 – 9
Ngā kura: TKKM o Ngā Mokopuna; TKKM o Te Rito; Te Kura Māori o Porirua.
Ngā kaupapa matua:
Ko ngā kaupapa matua i rukuhia ko ngā kōrero a Darcy Nicholas, ringatoi, mō te whare o Te Rau Karamu me Taranaki whānui; te ako i ngā tūtohu whenua o tēnei rohe mai i Ngā Rangatahi o Ngā Tapuwae ā-Taraika; te rukuruku ngongohā ki te taha o Jorge Jimenez, nō Mountains to Sea Wellington; te hīkoi i waenganui pō, te hīkoi i te ata hāpara anō hoki me Perry Hyde ki Te Māra ā-Tāne (Zealandia); te ako mō ngā rongoā Māori, te raranga me Kuruho Wereta; ngā taonga tākaro Māori me John Kingi nō Rangatahi Tū Rangatira; te ako mō ngā taiāniwhaniwha me te rewanga o ngā pae o te moana ki tō Te Aomania Te Koha taha, nō Te Pūao GNS; te tūhura i ngā papamahi i whakaritea e Wātene Campbell i Te Papa Tongarewa – mahi whai, mahi aruaru puipuiaki, here kono, waiata hoki – me te kite i ngā whakaaturanga o Manu Rere Moana me He Kaupapa Waka.
“Ko tētahi mea pārekareka [ o te ruku ngongohā] ko te kite i ngā kararehe. Te kite i ngā kōura, ngā tuna, ngā pāua, he mako, ngā ika, ngā rimurimu hoki.” – Tauira
Te Noho Taiao ki Te Upoko: Ko ngā tuira nō ngā kura kaupapa Māori o Te Upoko o Te Ika kua huia ki te tihi o te puke i Oruaiti – Hānuere 2023.
