Huihui ai ngā tauira reo o Maungataniwha ki te Hautuku me te Haumihi o Puanga ki Mangamuka Marae, i ēnei marama o Ōturu, Rākaunui o Pipiri. Koianei te tuarua o ngā wānanga kua tautokona kia tū tēnei ritenga i tēnei kāinga.
E whakatō rākau ana ngā tauira hei koha ki te whenua, hei kaupare i ngā waipuke i te marae o Mangamuka. I ahu mai ēnei rākau i Aurere, i Te Noho Taiao o Te Hiku.
I rere ngā karakia, ngā karanga ki ngā mate o te tau, ā i whakarērea ngā taumaha, ngā hara kia wātea. He hautuku tēnei kia poroākī i a rātou mā kia whetūrangitia, me te tau ka hori.
Rere tonu ngā kupu Haumihi ki a Puangarua, Puanga nui o te rangi, Puanga Kai Rau, he umu kohukohu whetū, he karakia, he karanga kia tau mai te kawaora ki ēnei uri, kia matomato te tupu o ngā hua o te whenua, o te tangata. Hakoa i patere mai te ua, i mahea ake i te atatū, kia kōkiri ēnei ritenga.
He kawaora tēnei kaupapa ki ēnei whānau e tuitui ana i te muka taura tangata kia piki ake te taumata reo i te kāinga. I whai wāhi ki te kōmiri i a Hineuku hei mahi tāonga pūoro mō te ritenga, ā i whakatō rākau hei koha ki te whenua.
E mihi ana ki a Aleesha Coulter, te kaihautū o tēnei waka me tōna tira tautoko. Ka rere tonu ngā mihi ki te kōhanga rākau i Aurere mō ngā rākau, ki Te Tairāwhiti mō ngā muka, ki a Manu Taupunga mō ngā taputapu uku, ki a Tuia Maara Whenua mō ngā rauemi me ngā rongoā. Otirā ki ngā tuākana o te kaupapa, ngā ākonga nō tērā tau i hoki mai ki te poipoi i te pitomata o tēnei rangapū. I tū tuatahi mai ki te whakanui i ēnei ritenga nō ngā mātua tūpuna, i tū pakari, i tū māia, i ngākau tapatahi te tū. E poho kūkupa ana.
Toitū te reo, toitū Puanga e.
Nau mai e te mātahi o te tau! Ko ngā tauira reo me te hapori o Mangamuka e mihia ana te tau hou Māori
“Enjoyed receiving new knowledge about ngā whetu. Matariki, Puanga, Tautoru. Enjoyed learning and completing a ritenga, feeling all of the emotions that come with it”
“I learned that my memory is like a muscle, needs to be exercised”
[challenges were] to stand and kōrero
memorising kupu, jumping out of comfort zone, speaking in front of everyone memorising and to actually speak, kōrero, nerves!
Ko te rangapū tuatahi e poipoi ana i te rangapū o tēnei tau ki te ako karakia mō te Hautuku, Haumihi ki a Puanga, Matariki
-
- Ko whaea Mihi Harris e tuku pūmahara ana mō te wānanga.
-
- He papamahi uku hei hanga pūoro mō te ritenga o Puanga
